អគ្គនាយកដ្ឋានដឹកជញ្ជូន៖ គ្មានការនាំចូលរថយន្តចង្កូតស្តាំទៀតនោះទេ

នៅក្នុងកិច្ចប្រជុំស្តីពីការពង្រឹងការងារផ្តល់សេវាសាធារណៈដឹកជញ្ជូនផ្លូវគោករបស់អគ្គនាយកដ្ឋានដឹកជញ្ជូន កាលពីថ្ងៃទី២១ ខែមករា ឆ្នាំ២០១៩ ម្សិលមិញ ដែលមានការចូលរួមពីលោកអគ្គនាយករង លោក លោកស្រីប្រធាននាយកដ្ឋាន លោកអនុប្រធាននាយកដ្ឋាន លោកប្រធានការិយាល័យជំនាញ មន្រ្តីពាក់ព័ន្ធនៃអគ្គនាយកដ្ឋានដឹកជញ្ជូនផ្លូគោក និងមន្ទីរសាធារណការ និងដឹកជញ្ជូនរាជធានី ខេត្តក្រោមអធិបតីភាព ឯកឧត្តម ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកបានឱ្យដឹងថា រថយន្តចង្កូតស្តាំនឹងមិនអនុញ្ញាតឱ្យមានការនាំចូលតទៅទៀតនោះទេ ដោយអនុញ្ញាតឱ្យទទួលចុះបញ្ជីរថយន្តចង្កូតស្តាំ ដែលមានស្រាប់នៅក្នុងប្រទេសតែប៉ុណ្ណោះ។

នៅក្នុងកិច្ចប្រជុំនេះដែរ ក៏បានដាក់ចេញនូវការបញ្ឈប់ការកែច្នៃយានយន្តខុសលក្ខណៈបច្ចេកទេស និងបញ្ឈប់ទទួលបេក្ខជនប្រឡងយកបណ្ណបើកបរប្រភេទសណ្តោង «ង» លើកលែងតែមានការអនុញ្ញាតពីអគ្គនាយកដ្ឋានដឹកជញ្ជូនផ្លូវគោក។ ហើយក៏ឯកភាពខិតខំកាត់បន្ថយពេលវេលានៃការផ្តល់សេវាសាធារណៈឱ្យលឿនជាងមុន៥០%ផងដែរ៕